На Сантос веќе му се исплаќа трансферот на Нејмар: Клубот „преку ноќ“ доби нови 20.000 членови!

04 февруари 2025 - 15:20

Бразилските медиуми се импресионирани од влијаението кое го остави Нејмар врз својот матичен клуб Сантос иако се уште не дебитирал по трансферот од Саудиска Арабија.

Нејмар изненади со одлуката да се врати во клубот каде што ја започна кариерата и од каде што се пресели во Барселона за 88 милиони евра во 2013 година.

Додека се чека неговото деби навивачите се борат и за влезница за овој натпревар. Претседателот на Сантос, Марсело Тешеира соопшти дека од потписот на Нејмар клубот добил 20.000 нови членови и за првпат ја надминал границата од 70.000 членови.

Стадионот „Вила Белмиро“ каде што Сантос ги игра своите натпревари може да прими 16.000 гледачи и јасно е дека тоа ќе биде премалку за сите кои сакаат повторно да го видат Нејмар во дресот на бразилскиот гигант.

Исто така екипата на социјалните мрежи доби и над 500.000 повеќе следбеници во само неколку дена.