Jaмал испишува историја - со ваков подвиг не може да се пофали никој друг!

19 јули 2026 - 20:10

Фудбалерите на Аргентина и Шпанија вечерва ќе го одиграат големото финале на Светското првенство. Двете најдоброрангирани репрезентации во светот според листата на ФИФА ќе се соочат од 21:00 часот на стадионот „МетЛајф“ во Њу Џерси.

За првпат во историјата на мундијалите, во финалето ќе играат актуелните европски и јужноамерикански шампиони. Селекторите ги објавија почетните состави, а во стартните 11 на Шпанија очекувано се најде и Ламин Јамал.

Деветнаесетгодишниот Шпанец вечерва ќе стане првиот фудбалер кој како тинејџер настапил и во финале на Европско првенство и во финале на Светско првенство.

Јамал ќе стане и третиот најмлад фудбалер кој играл во финале на Мундијал. Со 19 години и шест дена, тој е зад легендарниот Пеле, кој во финалето во 1958 година имаше 17 години и 249 дена, како и Џузепе Бергоми, кој финалето во 1982 година го играше со 18 години и 201 ден.