Селекторот на Шкотска задоволен од победата, но признава: Моравме да постигнеме уште два-три гола

Шкотите славеа на „Хемпден парк“ со двата гола на Џон Мекгин, додека единствениот погодок за Македонија го постигна Елмин Растодер. Со оваа победа, Покоњоли го запиша и првиот домашен триумф откако ја презеде селекцијата.

„Среќен сум поради резултатот и првата домашна победа. Играчите работеа многу напорно во текот на неделата за да го применат планот што го подготвувавме. Го контролиравме натпреварот, создадовме неколку шанси и бевме храбри во играта без топка“, изјави Покоњоли за Би-Би-Си.

Сепак, белгискиот стратег имаше забелешки за реализацијата и падот на концентрацијата по водечкиот гол.

„Требаше да го решиме натпреварот многу порано. Исто како на гостувањето во Словенија, а веројатно и во Македонија, требаше да постигнеме уште два или три гола. По првиот погодок паднавме во концентрацијата, а тоа е нешто од што мораме да научиме“, истакна селекторот.

Покоњоли беше задоволен од делови од играта, особено од агресивниот пристап без топка и притисокот врз противникот, но нагласи дека има уште многу простор за напредок.

„Не беше совршено, но видов многу работи што ги работевме на тренинзите. Среќен сум од прикажаното и им честитам на играчите за начинот на кој се обидоа да ги спроведат нашите замисли“, додаде предводникот на Шкотска.

Шкотланѓаните со трите бода ги задржаа шансите за второто место во групата, а во последното коло ги очекува гостување кај Швајцарија.