Четирите бода месецов ќе ѝ донесат на Македонија скок на ФИФА-листата од – две места!

Македонија со четирите бода со кои остана во трка за првите две позиции во групата кои директно водат на континенталниот шампионат ќе се најде на 69-то место на ранг-листата со 1.338,85 рејтинг поени и тоа ќе донесе напредок за две позиции во однос на јулското 71 место. Македонската селекција во овој месец освои нови шест бода во рејтингот и во моментов според ранг-листата на ФИФА е четврта по рејтинг, зад Полска, Австрија и Словенија, а пред Израел и Летонија, кои од поодамна се зад нас.

Полска со лошите два меча (пораз и реми) ќе назадува за две позиции до 22-то место, Австрија и покрај четирите бода ќе остане на 27-та позиција, а најголем скок ќе запише Словенија со напредокот од четири позиции по триумфите над Полска и Израел и сега ќе се најде на 59-та позиција. Израел после само едниот освоен бод ќе назадува за две места до 86-та позиција, додека фенерџијата Летонија ќе падне за пет места на 139-то место.

На врвот на листата Белгија останува лидер, а Франција и Бразил сега ќе си ги сменат позициите и „триколорите“ ќе бидат пред „кариоките“. Англија останува четврта, а Португалија со скок од едно место е петта. Во „топ десет“ уште се и Уругвај (пад за едно место), Шпанија (скок за две позиции), Хрватска и Колумбија (пад за по едно место) и Аргентина.