Спектакл на стартот: Шест гола, победа на Ливерпул - Киеза и Салах спасители (ВИДЕО)

15 август 2025 - 23:01

Шампионот Ливерпул со победа ја почна одбраната на титулата во Премиер лигата откако вечерва, на отворањето на новата сезона, на домашен терен го победи Борнмут со 4-2.

Навивачите на Енфилд имаа што да видат, а малку недостасуваше да си заминат разочарани. Ливерпул водеше со 2-0 по 49 минути игра, благодарение на головите на Екитике и Гакпо и во тие моменти се чинеше дека „црвените“ без проблеми ќе ги освојат првите три бода во сезоната.

Сепак, така не мислеше Семенјо кој во 64. и 76. минута два пати го совлада Алисон и се погрижи Борнмут да замолкне над 60 илјади домашни навивачи, израмнувајќи на 2-2. Гостинските фанови почнаа да се подготвуваат за реми, потајно се надеваа и на сензација, но одбраната на тимот покажа неверојатна конфузија во клучните моменти.

Прво во 88. минута двајца фудбалери на Борнмут се сплеткаа и буквално му ја подарија топката на Киеза кој од 7-8 метри ја закова во мрежата на гостинскиот тим за водство од 3-2, а длабоко во судиското продолжение Мохамед Салах стави точка на мечот со својот прв гол во сезоната.