Спалети не го вади од уста македонскиот „дијамант“: Елмас е сјајот во моите очи!
Откако Спалети е дојден во Неапол, лош збор нема кажано за Елмас, а кога и да го прашаат новинарите за Македонецот, едно исто повторува дека е воодушевен и дека нема намера да се откаже од него.
Наполи во моментов е во Анталија (Турција) на подготовките пред стартот на вториот дел од сезоната во јануари, па повторно тема на новинарите беше Елмас.
„Елмас е сјајот на моите очи, без оглед дали играл или не. Елиф е сјајно момче, кој може да игра на секоја позиција. Тоа е фудбалер кој сака постојано да работи и константно да напредува. Тој е фудбалер кој може да добие меч дури и ако игра десет минути. Фудбалер кој трча, притиска, ја зема топката... Што и да се случи, останува светлината во моите очи“, рече Спалети.
Наполи по 15 кола има 13 победи и е без пораз, па сега е главен кандидат за „скудетото“, кое во Неапол се чека уште од ерата на Диего Марадона, повеќе од три децении.