Модриќ носи уште еден Хрват во Милан за идната сезона

31 јануари 2026 - 11:33

Милан веќе работи на засилувања за средниот ред, а едно од најголемите изненадувања може да биде потпишувањето на Матео Ковачиќ, кој го напушта Манчестер Сити претстојното лето.

Според италијанските медиуми, „росонерите“ повторно се интересирале за ситуацијата на поранешниот играч на Интер откако веќе се обиделе да го контактираат ова лето, а иницијативата доаѓа директно од Лука Модриќ. Капитенот на хрватската репрезентација наводно го контактирал Ковачиќ претходните денови за да го информира за амбициите и новиот правец на Милан. Модриќ би бил воодушевен повторно да игра со својот пријател и долгогодишен соиграч од репрезентацијата со кого ја делеше соблекувалната и во Реал.

Договорот на Ковачиќ со Манчестер Сити истекува во 2027 година, но англиските медиуми објавуваат дека клубот ќе го продаде на лето. Милан на тој начин би создал уште посилен среден ред и би го обединил хрватскиот тандем во дресот на Милан.

Ова веројатно значи и дека Модриќ не планира да ја заврши играчката кариера и ќе биде активен и на 41-годишна возраст, колку ќе наполни во септември.