„Кралот“ на колена среде „Бернабеу“: Бетис шокантно го победи Реал во 94-та минута (ВИДЕО)

20 септември 2017 - 23:59

Европскиот и шпански првак Реал Мадрид доживеа неверојатен шок пред своите гледачи откако Бетис во вонредното пето коло во шпанската Ла Лига во 94-та минута стигна до голема победа, а „кралевите“ освен без бодови не успеаа да го надминат рекордот на бразилски Сантос од времето на легендарниот Пеле.

Мадриѓаните пред три дена го израмнија рекордот на бразилскиот клуб од 73 меча на кои последователно даваат барем еден погодок, и вечерва се очекуваше „кралевите“ да бидат рекордери. Плус на теренот се врати и Кристијано Роналдо по суспензијата од четири меча, но сето тоа не беше доволно. Бетис ги изненади, на „Сантијаго Бернабеу“ не само што успеа да се одбрани, туку и со гол во судиското надополнување ги шокира навивачите на Реал.

Антионио Санабрија со глава ги матираше „кралевите“ по брзиот противнапад и еден перфектен центаршут од Бараган.

За Реал ова е прв пораз, а има и две ремија во пет меча, па сега мадридскиот великан е на седум бода помалку од големиот ривал Барселона, која е со максимален ефект со 15 бода.