Вардар има гостински предизвик во Кавадарци, Арсими го игра првиот домашен меч во Прва лига!

Вардар новата сезона ја отвори со убедлива победа над Пелистер, а Тиквеш ремизираше на домашен терен против Работнички.

Кавадаречкиот тим не покажа многу против Работнички во првото коло, а сега има шанса за подобра претстава против нивниот сосед Вардар.

„Вардар е една од најквалитетните екипи во домашниот шампионат во моментов и тоа го покажува долгата низа на мечеви без пораз. Освоениот Куп, настапот во Европа, сето тоа не е случајно. Вардар игра многу дисциплинирано и тоа за нас е дополнителен мотив да одиграме добар меч. Само доколку бидеме на највисоко ниво ќе дојдеме до посакуваниот резултат. Вардар заслужува огромен респект и е еден од главните кандидати за шампионската титула сезонава. Сепак, Тиквеш е тим кој никој не смее да го потцени, бидејќи имаме квалитет на секоја позиција. Атмосферата во тимот е одлична и очекувам квалитетен и неизвесен меч. Секако, се надевам на огромна поддршка од цело Кавадарци, за да можеме да дојдеме до посакуваниот резултат“, изјави голманот на Тиквеш, Христијан Стефковски за сајтот на ФФМ.

Во првото коло за Вардар блесна младиот Димитар Данев кој вели дека целта на црвено-црните се трите бода од Кавадарци.

„Секако дека не очекува тежок дуел. Сепак, Вардар е клуб кој секогаш и секаде оди на победа. Атмосферата во тимот е одлична по стартниот триумф против Пелистер и во Кавадарци одиме да ја потврдиме моменталната форма. Респект за домаќинот, Тиквеш е квалитетен тим, но ние сакаме да имаме три бода. Ќе дадеме сè од себе за да исполниме сè што ќе бара од нас тренерот Гоце Седлоски и подготвени сме да ги израдуваме нашите навивачи“, изјави Данев.

Арсими со бод во Куманово против Башкими дебитираше во најдобрата македонска лига, а сега време е за првиот домашен натпревар, противник е Струга.

„Струга е силен и квалитетен противник со големо искуство, но ние направивме детална анализа и знаеме каде можеме да ги изненадиме. Очекувам тежок дуел од првата до последната минута, но верувам во мојот тим и во поддршката од нашите навивачи. Секој фудбалер е свесен колку е важен овој натпревар и ќе дадеме максимум за да стигнеме до трите бода“, изјави еден од најзначаните играчи на Арсими, Арѓент Гафури.

Струга ТЛ имаше старт каков што посакуваше, со триумф над Македонија Ѓорче Петров. Денеска стружани го имаат првото гостување оваа сезона.

„Стартувавме успешно и целта на Струга Трим Лум е да продолжи победнички. Мислам дека имаме квалитетен тим, новиот тренер Бледи Шкемби успеа да ги вкомпонира добро и новите засилувања и сега останува ние да ги исполниме неговите задачи и да стигнеме до успех и против Арсими. Нема да биде лесно, противникот е нов прволигаш, сигурно ќе имаат огромна мотивација пред домашните гледачи, но ние сме подготвени и веруваме дека ќе ја оствариме целта. Го анализиравме Арсими, се работи за квалитетен тим, го покажаа тоа и на гостувањето кај Башкими. Имаат неколку одлични индивидуалци. Но, доколку ние бидеме на вистинското ниво, мислам дека ќе успееме да стигнеме до бодовите“, изјави напаѓачот на Струга, Марјан Радески.

Распоред на 2. коло:

Денеска
Арсими – Струга 17:00
Тиквеш – Вардар 17:00
Сабота
Македонија ЃП - Шкендија 17:00
Работнички – Башкими 17:00
Недела
Шкупи – Силекс 17:00
Понеделник
Брера – Пелистер 17:00