ФФМ закажа одложен меч за 2050 година! (ФОТО)

25 септември 2017 - 16:29

Вонредното осмо коло во македонската фудбалска Прва лига на програмата е во среда, а шампионот Вардар својот меч против дебитантот Академија Пандев нема да го одигра поради гостувањето во Норвешка кај Розенборг во групата Л во Лига Европа (19 часот).

Уште од поодамна беше јасно дека дуелот на вардарци против „пандевци“ ќе се одложи и дека најверојатно ќе се одигра или на крајот на годинава или на пролет, а Фудбалската федерација на Македонија (ФФМ) на својата интернет-страница го закажа дуелот во – 2050 година!?

Според ФФМ, дуелот Академија Пандев – Вардар ќе се игра на ден пред Нова година (31.12) за 33 години отсега. И тоа во термин – 10.10 часот наутро.