Скандал во БиХ: Велкоски морал да игра против шест фудбалери заразени со Ковид-19!

20 октомври 2020 - 09:59

Голем скандал деновиве го тресе босанскиот фудбал, откако тимот на Широки бил приморан да го одигра мечот против Сарајево (0-2) иако до тој момент имале дури 12 фудбалери позитивни на коронавирусот и само 13 играчи кои во тој момент можеле да настапат.

Челниците на фудбалскиот сојуз на БиХ не им ја прифатиле молбата за одложување, поради што Широки морал да истрча на теренот и тоа со дури шестмина кои веќе утредента пројавиле симптоми на Ковид-19.

„Покрај 12-те фудбалери кои претходно имаа симптоми и беа ставени во изолација, денешното тестирање потврди дека уште дури шест играчи кои настапија на дуелот со Сарајево и еден член на стручниот штаб се позитивни на коронавирусот. Се плашевме од вакво сценарио и затоа побаравме одложување, бидејќи не е во прашање само Широки туку и нашиот противник и официјалните лица. Животите треба да се над сѐ“, се вели во соопштението на овој клуб.

Ова значи дека меѓу потенцијалните „жртви“ на сулудата одлука да настапат играчи кои биле во контакт со заразени со Ковид-19 се и фудбалерите на Сарајево, меѓу кои е и македонскиот интернационалец, Крсте Велкоски.