Легендарен фудбалер на Партизан: Мафијата сакаше да ме киднапира – беше страшно (ВИДЕО)

21 ноември 2024 - 17:01

Матеја Кежман, поранешниот српски репрезентативец и меѓу другите фудбалер на Партизан, Челси, Атлетико Мадрид и на ПСВ, во емисијата „(Не)успех на шампионите“ раскажа за една од најтешките ситуации во неговиот живот – обидот за негово киднапирање додека играл во Холандија.

Како што објасни, случајот бил организиран од човек со српско потекло кој живеел во оваа земја, но благодарение на холандската полиција, криминалната група не успеала да го реализира својот план.

„Сè уште ми изгледа како сон. Не можам да прифатам дека тоа навистина се случи. Слетав во Амстердам по натпреварот со репрезентацијата во Кардиф и тогаш двајца полицајци ме приведоа. Бев збунет и исплашен, барав веднаш адвокат. Тие ми рекоа дека сè е во ред и ме одведоа во полициско комбе“, раскажа Кежман.

Преку пријател од Холандија, Кежман дознал што точно се случило. Според него, полицијата преку разузнавачки информации успеала да го открие планот и навреме да го спречи.

„Мојот пријател Петар Раѓански, кој често ме примаше во неговите ресторани, ми раскажа што било испланирано. ПСВ веднаш реагираше, а тренерот Гус Хидинг ми даде огромна поддршка. Тој и клубот беа со мене цело време“, додаде тој.

Кежман објасни дека по инцидентот, седум до осум месеци бил под постојано обезбедување.

„Се чувствував како да живеам во кафез. Обезбедувањето беше со мене секогаш – на тренинг, шопинг, дури и на натпревари во Грција. Сето тоа беше на трошок на клубот бидејќи криминалците сакале да го уценат ПСВ. Кога дојде време за трансфер во Челси, реков дека не можам повеќе вака да живеам“, заврши Кежман.

Тој е еден од најуспешните напаѓачи на Балканот, со богата кариера во елитни клубови. Србинот играше уште и за Фенербахче, ПСЖ, Зенит, а за селекцијата на поранешна Србија и Црна Гора одигра 49 средби и постигна 17 голови.