Динамо заостана зад Хајдук и го избрка тренерот

Иако минатата сезона успеа да ја освои двојната круна, триумфирајќи во домашното првенство и Купот на Хрватска, Ковачевиќ не ја задржа довербата на раководството. Резултатската криза и слабите изданија во последниот период ја забрзаа одлуката за неговото заминување од „Максимир“. По поразот од Рудеш, Динамо заостанува четири бода во однос на лидерот Хајдук иако со натпревар повеќе од својот голем ривал.

Клубот објави дека договорот е раскинат спогодбено, а за следните два натпревари првиот тим ќе го води Јерко Леко, досегашниот тренер на вториот состав на Динамо.

Леко ќе има исклучително тешка задача уште на дебито, бидејќи Динамо го очекува гостување кај Сандерленд во Лигата на Европа на 5 ноември. Три дена подоцна, загрепчани ќе играат и против Вараждин во домашното првенство. Ова засега е само привремено решение, а клубот не го објави името на тренерот кој долгорочно ќе го наследи Ковачевиќ.

Ковачевиќ заминува по 73 натпревари на клупата на Динамо. Во тој период забележа 48 победи, 11 нерешени средби и 14 порази. Под негово водство тимот постигна и рекордни 93 гола во една сезона во форматот на хрватското првенство со десет клубови. Интересно е што Динамо до септември имаше низа од 28 првенствени натпревари без пораз, најдолга во последните десет години. Сепак, резултатите во новата сезона не ги исполнија очекувањата, а елиминацијата од Викинг во квалификациите за Лигата на шампионите и последниот пораз од Рудеш беа сериозни удари за амбициите на клубот.