Бурно на „Максимир“: Адеми и другарите го одбиле жестокото кратење на платите!

25 март 2020 - 20:52

Откако Динамо Загреб го претстави својот финансиски план во кризниот период порари пандемијата со коронавирусот, според кој секој фудбалер до крајот на годинава ќе остане без третина плата, а втората третина ќе им се исплаќа одложено откако ќе се рестартира сезоната, сериозна криза го затресе „Максимир“ зашто предлогот го одбиле македонскиот репрезентативец Аријан Адеми како капитен и останатите фудбалери на „модрите“.

Хрватски „Индекс“ објави дека целиот фудбалски погон од А-тимот сосе тренерот Ненад Бјелица го одбиле предлогот на клубот, кој со кратењето на платите сака да се заштити со евентуална поголема финансиска криза, но во ек на најголемите успеси и сериозните приливи во касата од настапите во изминатите две сезони, фудбалерите не сакаат помалку пари.

Најниската плата во Загреб во професионалниот погон е 100.000 евра годишно, а тренерот Ненад Бјелица има 1,5 милиони евра нето, додека Адеми над половина милион евра со новиот договор што неодамна го потпиша.

Дека нема прифаќање на понудата од Динамо е последното соопштение во кое клубот им се заблагодари на сите членови на Б-тимот и на сите вработени за прифаќањето на мерките, но не и на првиот тим, кој очигледно не сакаат вакви непопуларни потези со кои се удира по нивниот џеб.