Македонија на „Театарот на соништата“ сонува за скалп на нов великан (ФОТОГАЛЕРИЈА)

18 јуни 2023 - 17:08
ФУДБАЛ

Македонската фудбалска репрезентација после 17 години повторно е на „Олд Трафорд“, денеска го сефтоса на последната подготовка за утрешниот меч со Англија во евроквалификациите, со сон да направи ново изненадување и да ја продолжи традицијата да остане непоразена на гостувањата на Островот и третпат по ред.

После ремито на „Сент Мери“ во 2002 година со 2-2, па ремито без голови на култниот дом на Манчестер јунајтед во 2006, оваа македонска генерација сега има сон за да изненади и во своето портфолио на чуда после Германија и Италија, да го придодаде и актуелниот европски вицепрвак.

Избраниците на селекторот Благоја Милевски ќе мора да се издигнат и да го заборават болниот пораз во петокот од Украина, ако сакаат да се понадеваат на добар резултат, иако пред себе ќе имаат извонреден противник, кој има фантастичен тим и одличен старт во овој циклус со максимални девет бода од трите досегашни мечеви.