Зверев немоќен против најдобриот: Синер е крал на Вимблдон

За Италијанецот ова е петта Гренд слем титула, а втора на британскиот турнир со што ја продолжи својата доминација. Исто така, ова е прв Гренд слем трофеј за него сезонава откако во Мелбурн и Париз не успеа да стигне ни до финалето.

Зверев даде се од себе за да дојде до својот втор триумф на најсилните турнири откако минатиот месец триумфираше на „Ролан Гарос“. Го освои првиот сет во тај-брејк, но потоа беше немоќен да направи нешто повеќе пред налетот на фантастичниот Синер. Во текот на целиот натпревар, германскиот тенисер не освои ниеден брејк што најдобро зборува за моќта на противникот.

Своите шанси, Зверев ги пропушти во седмиот гем од третиот сет кога при 3-3 имаше една брејк шанса и потоа во четвртиот гем од четвртиот сет кога имаше 30-0 на сервис на Синер. Италијанскиот тенисер знаеше да го искористи тоа и да дојде до уште голем триумф во својата кариера.

Утеха за Зверев е тоа што по Вимблдон се искачи на второто место на АТП листата, но има безмалку 5.000 бода помалку од Синер кој многу веројатно ќе ја заврши годината на челната позиција.