УС Опен ќе добие нов шампион: Алкараз повраќаше, се врати и изгуби од Шелтон во 3 часот наутро

Американецот славеше со 6-7, 6-1, 6-3, 1-6, 7-6, по повеќе од четири часа жестока борба на „Артур Еш“. Мечот заврши во 3:34 часот по полноќ по локално време, со што влезе во историјата како најдоцна завршен натпревар на УС Опен.

Алкараз одлично го започна дуелот и го освои првиот сет во тај-брејк, но Шелтон одговори фантастично. Американецот направи целосен пресврт со убедливи 6-1 и 6-3 во вториот и третиот сет. Шпанецот во еден момент поврати во својот пешкир од преголем напор, но сепак, не се предаде. Алкараз се врати во мечот со доминантен четврти сет, во кој загуби само еден гем, па дуелот мораше да биде решен во петтиот сет.

Во решавачкиот сет ниту еден од тенисерите не успеа да направи клучен брејк. Следуваше драматичен тај-брејк, во кој Шелтон покажа повеќе смиреност и го доби со 10-7, за една од најголемите победи во својата кариера. За Шелтон ова е особено значаен триумф, бидејќи за првпат во кариерата успеа да совлада тенисер од топ 3 на Гренд слем турнир. Со победата, Американецот избори пласман во полуфиналето, каде што ќе има уште една домашна пресметка – против Франсис Тиафо.

За Алкараз, пак, турнирот завршува во четвртфиналето. Шпанецот се врати на теренот по пауза поради повреда и на УС Опен пристигна како бранител на титулата, но не успеа да го продолжи походот кон нов трофеј. По неговата елиминација е јасно дека Гренд слемот во Њујорк ќе добие нов шампион.