Синер брутално искрен: Во што можам јас да се споредувам со Ѓоковиќ, луѓе мои!?

24 април 2024 - 12:04

Италијанскиот тенисер, Јаник Синер, игра ви одлична форма сезонава, но и покрај тоа самиот е доволно свесен дека се уште е многу далеку од она што го има постигнато Новак Ѓоковиќ, со кого се почесто го споредуваат во последно време.

Пред почетокот на мастерсот во Мадрид, вториот играч на планетата беше запрашан дали смета дека е најдобар во светот во моментов, а со својот одговор тој покажа колкава почит има кон своите големи ривали.

„Тешко е да се одговори на тоа прашање. Мислам дека не можам апсолутно во ништо да се споредувам со Ѓоковиќ и со сето она што тој го направи. Имам многу почит кон него, како што го почитувам и Алкараз, кој освои повеќе титули од мене. Се трудам да играм тенис, да дадам се од себе и да видам што можам да постигнам“, изјави Синер.

Тој се присети и на моментот кога првпат го видел Рафаел Надал, еден од најдобрите тенисери на сите времиња, особено за земјени терени.

„Кога имав 14 или 15 години, првпат отидов во Рим и го видов како тренира. Првпат го видов во живо и беше неверојатно. Можев да го видам тој интензитет. Така е и денеска. Страста го одржува, одлично е што и денес можам да го видам“, дополни Италијанецот.

Синер е слободен во првото коло во Мадрид, а во второто ќе игра против победникот од мечот Лоренцо Сонего против тенисер од квалификациите.