„На Ѓоковиќ му е загрозена кариерата, мислам дека нема да освои нови гренслем-титули“

Тешката драма во Австралија конечно доби свој епилог, кој беше негативен за српскиот тенисер Новак Ѓоковиќ, кој мораше да биде депортиран од државата.

Многу познати спортисти ја коментираа одлуката на судот, а своја изјава кажа и Матс Виландер.

„Изненаден сум и шокиран, но во исто време и изморен поради тоа што се случуваше во претходните денови. Морам да му дадам признание на Ѓоковиќ кој даде сè од себе за да остане и да игра на Австралијан опен. Меѓутоа сметам дека судот донесе праведна одлука, зашто милиони луѓе починаа од коронавирус ширум светот“, вели Виландер.

Поранешниот шведски тенисер кажа и дека Србинот може да остане без нови гренслем-титули.

„Судијата мора да разбере дека можеби ја промени историјата на тенисот. Не можам ниту да замислам во каква состојба е Новак. Ова е негов омилен турнир, го освои девет пати и ја бркаше 21. гренслем-титула во кариерата. Според мене постои шанса сите тројца да ги завршат кариерите со по 20 гренслем-титули“, кажа Швеѓанецот.