Ѓоковиќ ќе мора да ѝ плати на Австралија и казна од – половина милион долари!

16 јануари 2022 - 11:10

Новак Ѓоковиќ во следните неколку часа ќе си замине од Австралија, со што и официјално ќе биде ставен крај на сагата со неговиот настап на гренслем-турнирот во Мелбурн, откако му беше укината веќе дадената виза, на што тој се жалеше и доби на првостепениот суд, но потоа „падна“ на следната судска инстанца, која застана зад одлуката на австралиската влада.

Загубата на српскиот тенисер ќе биде повеќекратна, првенството што нема да има можност да дојде до историскиот 21. трофеј од најголемите светски собири со што дефинитивно би станал најдобар на сите времиња, но и што ќе остане без шанса да биде прв со двоцифрен број победи на Австралија опен. Згора на тоа, наместо со парична награда за остварениот успех, тој ќе остане и без 500.000 долари, кои мора да ѝ ги плати на Австралија како компензација за судскиот процес по негово барање, кој тој го загуби.

Ѓоковиќ најави дека во следниот период ќе одмори и ќе се рекуперира по пеколната недела, а неговиот татко Срѓан најави дека ќе се види со сите во Париз, алудирајќи на „Ролан Гарос“, вториот гренслем-турнир на кој популарниот Ноле ќе ја има првата следна шанса за влез во историјата.