Кој ја мати водата околу струшката сала „Нико Нестор“?
Накратко за салата „Нико Нестор“ од Струга.
Можеби не е за верување, но истата е спортска арена во која функционираат и се натпреваруваат неколку суперлигашки спортски клубови во ракомет и кошарка. Ако денес влезете во неа ќе ве затекне атмосфера на руина и распад налик на објектите после чернобилската катастрофа. Покрај искршените стакла на страната, честото паѓање на кровните стакла за време на тренинзите и натпреварите, прокиснувањето, дотраената електрична инсталација која колабира на секој половина час ќе ве затекне и одвратна миризба која се шири од санитарните јазли од подтрибинскиот простор и мувла на ѕидовите која се таложела долги години. Подлогата на салата пак, многу стар и дотраен линолеум поставен пред речиси пеесет години, на места до толку деформиран што спортските топке не отскокнуваат воопшто.
Чија е спортската сала?
На документ истата ѝ припаѓа на СОУ Нико Нестор-Струга“ и Сојузот на спортови Струга, кој е правен наследник на Сојузот за Физичка Култура –СОФК-а, важна спортска организација која во минатото го организираше целокупниот спортски живот во градот и ја организираше популарната Спортска вечер се до 2014 година. Нејзин претседател е Ѓорѓи Чуркоски, а Управниот Одбор е сочинет од :
- Никола Попоски - Пинг Понг клуб Струга;
- Здравко Стефаноски - Шаховски куб Стефо Балто
- Фијат Шате - ФК Влазними
- Драган Ќелешоски - КК Црн Дрим
- Владимир Кавај - Едриличарска федерација
- Никола Таштаноски - ФК Караорман
- Јован Трпеноски - ЖРК Стружанка
- Арбен Борова - ОФС Струга
- Наумче Мојсоски - РК Струга
- Илија Николиќ - Кајакарски клуб Црн Дрим
- Гоце Трајаноски - Стрелачки сојуз
- Ристо Талевски - Тријатлон клуб Титани
- Здравко Голабоски - Веслачки клуб Црн Дрим
- Ѓорѓија Стојанов - Џудо клуб Црн Дрим
Дел од нив се одзваа на нашето барање за подробни информации за функционирањето на Сојузот со одговор дека до сега никој, никогаш не ги повикал на состанок, а камо ли на годишно Собрание и дека не се запознаени за стопанисувањето со спортската сала бидејќи ниту еднаш не биле свикани да им се даде отчет за финансиското работење
Според документите од централниот регистар на Република Македонија Ѓорѓи Чуркоски е пензионер, претседател на Спортскиот Сојуз –Струга, Претседател на пливачкиот клуб Струга, член на неколку управни одбори на спортски клубови и поранешен претседател на ФК Караорман. Според стружани, зад неговото име се поврзани неколку контроверзии кои датираат од време на пандемијата и рестрикциите за движење на населението.
„Салата ја користиме претпладне и е ужасна, во секој момент може да ни се случи катастрофа налик на онаа во Кочани. Чувај боже! Вратите се швајцувани со железни мрежи, еден нема да се спаси ако дојде до катастрофа, вели еден професор по Физичко образование.
Еден поранешен спортист и репрезентативец пак прашува:
Кој го штити Ѓоко Чурка пред законот? Долги години Сојузот наплаќа пари од клубовите кои се уплаќаат на сметката, за потоа да се вели дека сојузот е под стечај? Истиот тој е поврзан и со неправилно финансиско работење во ФК Караорман, од каде што потоа беа наплатени огромни отшети. И сега одеднаш се разбудија заедно со директорката Кети и управата на РК Струга и тврдат дека салата не чини кога тие ја стопанисуваат заедно од 2014 година...
И сега прашуваме на кој градоначалник да му се отстапи спортската сала - дали на оној истиот што дозволи наводна спортска сала на брегот на езерото, а испадна салон за свадби и веселби? Или пак на градоначалникот што ја узурпираше зградата на ОУ „Браќа Миладиновци“?, велат длабоко засегнатите стружани.
Се обидовме да го контактираме претседателот на Сојузот на Спортови од Струга, г-дин Ѓорѓи Чуркоски и директорката на СОУ Нико Нерстор Струга г-ѓа Кети Јанкоска, но за жал ниту еден од нив не ни одговори на повиците.