Струмичкиот дрим-тим моќно го почна настапот во ЦЕВ купот!

Македонскиот тим постојано имаше предност против Фино Капошвар, иако ривалот успеа неколку пати да израмни, меѓутоа екипата на Струмица во завршницата влезе во одлична серија и славеше со 25-19.

Струмица и во вториот сет го диктираше темпото и водеше со 21-16 во финишот, меѓутоа Фино Капошвар блесна и намали на само еден поен (22-23). Сепак, сетот му припадна на македонскиот претставник со 25-23.

Фино Капошвар не успеа да ѝ парира на Струмица ниту во последниот сет, каде што одбојкарите на домашниот состав беа подобри со 25-19.

Македонскиот одбојкарски тим претходно беше елиминиран од грчки Олимпијакос во квалификациите за Лигата на шампиони.