Македонија со мажи и жени пак ќе игра во Европската лига, која добива – огромно значење!

02 декември 2025 - 11:04

Македонските одбојкарски селекции во двете конкуренции и следната година ќе настапат во Европската лига (ЕЛ), откако Извршниот одбор на ОФМ одлучи да го продолжи континуитетот на учество во ова натпреварување.

Од 2026 година оваа лига добива уште поголема важност, бидејќи ќе го замени традиционалниот квалификациски систем за пласман на ЕП 2028. Машката репрезентација е редовен учесник во ЕЛ уште од 2014 година, оставајќи константен печат на континенталната сцена, додека женската селекција, пак, ќе има свое трето појавување, а второ по ред, откако дебитираше во 2023 година.

Според моменталните насоки на ЦЕВ, квалификациите за ЕП 2028 ќе се одвиваат исклучиво преку Европската лига во двете последователни изданија — 2026 и 2027. Пласман на континенталниот собир ќе обезбедат по четири најдобри репрезентации од секое од овие две изданија (вкупно осум), како и четирите земји-домаќини на првенството, шампионот од ЕП 2026 и уште 11 селекции според ранг-листата на ЦЕВ по завршувањето на Европската лига 2027.

Досегашното учество и запазениот континуитет ја позиционираат Македонија како стабилен дел од европската одбојкарска мапа, токму во период кога натпреварувањето добива нова, клучна улога во квалификацискиот процес.