Парондо: Полека, победивме само три меча, а има 14!

01 октомври 2018 - 12:26

Вардар нема време за ликување и искажување на задоволството од скалпот на „Веспрем арена“, затоа што утре го очекува нов дуел, со Војводина, во СЕХА-лигата. Сепак, прес-конференцијата која има задача да го најави тој натпревар, не можеше, а да не ја искористиме за да го прашаме Роберто Парондо - како Вардар го прави ова чудо.

Вардар не беше вбројан ни во десетте први фаворити во ЛШ, а сега игра како тим со квалитет за Ф4. Европа можеби го сврти погледот кога го симна на колена европскиот првак Монпелје, но задолжително се вџаши кога го надигра и Веспрем во една од најжешките арени на континентов. Сепак, Парондо ја задржа скромноста и вели дека ова уште не е ништо.

„Имавме добар почеток на ЛШ, победувавме во Монпелје, победувавме во Веспрем, но тоа е минато. Им кажувам на играчите сега да гледаат на следниот натпревар, сега имаме два нови натпревара и треба да се фокусираме на нив. Ако играчите продолжат да се борат како што се бореа досега можеме да победуваме и понатаму. Меѓутоа мора да го одржиме високиот интензитет и борбеноста и играчите да бидат фокусирани како и досега. ЛШ е многу тешка, со многу квалитетни тимови и мора да играте постојано на високо ниво. Ние победивме само на три меча, а има 14“, вели Парондо.

Следен предизвик за Вардар е Рајн-Некар, в сабота во Скопје, а на 14 октомври му гостува на Кјелце.