Франција ја здроби Чешка, Шпанија подобра од Србија на стартот на ЕП

15 јануари 2026 - 19:39

Европското првенство (ЕП) во ракомет почна денеска со два натпревари од 18 часот, при што во еден од нив Франција ја декласира Чешка со 42-28, додека Шпанија славеше со 29-27 против Србија.

Француските ракометари имаа одличен почеток со серија од 6-0, по што Чешка стигна до првиот погодок, по што стана јасно кој ќе биде поблиску до победата на оваа средба.

На полувремето Франција замина со водство од 20-14, а во вториот дел продолжи да го полни голот на Чесите и на крајот триумфира со убедливи 42-28.

Дури тројца ракометари на победничкиот тим постигнаа по шест голови, и тоа Елохим Пранди, Мелвин Ричардсон и Дилан Нахи. На спротивната страна најдобар беше Петр Широки со шест погодоци.

Шпанија го контролираше мечот од стартот против Србија, која се мачеше да ја намали негативата под три погодоци, а на крајот на полувремето губеше со 15-19.

Второто полувреме го одбележа израмнета игра од двете репрезентации, со падови и добри моменти, но Шпанија ја задржа предноста до крајот и славеше со 29-27.

Најефикасен во составот на Шпанија беше Тарафета со пет голови, додека Којадиновиќ запиша шест погодоци за Србија.

Фото: EPA