Вардар мисли и на иднината – го продолжи договорот со младиот Стојановски!

16 јануари 2026 - 10:16

Екипата на Вардар паралелно со формирањето состав кој би ја вратил доминацијата во македонскиот ракомет и би се вратил во европскиот врв, истовремено мисли и на иднината за што доказ е продолжување на соработката со 20-годишниот Марио Стојановски, кој ќе го носи дресот на „црвено-црните“ и во наредните две сезони.

Станува збор за ракометар кој е израснат во вардаровата школа, како еден од ракометарите кои трпеливо и сигурно го трасираа својот пат до сениорскиот тим. Во изминатиот период се наметна како доверлива опција на позицијата лево крило, а неговиот континуиран напредок беше препознаен од стручниот штаб, кој му доделуваше сè поголема минутажа.

Стојановски има големо репрезентативно искуство со младите селекции на Македонија, што дополнително ја потврдува неговата перспектива и потенцијал за понатамошен развој. Од таборот на Вардар истакнуваат дека и во наредниот период ќе сметаат на енергијата, посветеноста и желбата за напредок на Стојановски, со јасна цел за заеднички успеси и враќање на клубот на врвот.