Самсоненко го „брка" Вардар од „Јане", барал кирија 30.000 евра месечно!

27 мај 2020 - 12:57

Трансферот на сопствеништвото на РК Вардар би требало да се официјализира од понеделник, 1 јуни, како што најави и Михајло Михајловски, арно ама, сега излегле некои нови моменти, кои ќе му отежнат на се уште актуелниот европски шампион.

Според информациите на Спорт1, Сергеј Самсоненко му побарал кирија на Вардар за користење на спортскиот центар „Јане Сандански“. Првичнииот разговор не бил таков, односно Сергеј најавил дека Вардар ќе може непречено да ја користи салата која веќе стана негов препознатлив знак во Европа. Меѓутоа, работите наводно се смениле и сега газдата во заминување на „својот“ Вардар му барал 30.000 евра месечно за користење на „Јане“.

Се очекува да се види развојот на целата ситуација, веќе од следната недела, а постои можност Вардар да се пресели во „Борис Трајковски“, националната арена која беше дом на Металург за натпреварите од Лигата на шампионите.

Салата „Јане Сандански“ ја изгради Самсоненко и првпат почна да се користи за натпревари есента во 2014 година. Оттогаш, Сергеј има 30-годишна концесија за користење и практично може да постапи како што сака.