Пелистер во последните пет минути го скрши отпорот на Охрид

Откако вчера Тиквеш на домашен терен го победи Вардар, вечерва Пелистер се намачи со Охрид, беше и на раб на пораз за на крајот да слави со 31-27. Отпорот на охриѓани беше скршен во последните пет минути откако на моменти водеа и со три разлика против големиот фаворит и актуелен шампион.

Цело прво полувреме мина во израмнета игра при што темпото го диктираше Охрид кој во 18. минута водеше со 13-10. Пелистер успеа да ја достигне негативата и на голем одмор се замина со 17-17. И во вториот дел слична слика, Охрид најчесто беше во предност, а последното од два разлика на 12 минути пред крајот на мечот со 24-22. Клучна беше серијата од 5-1 на битолскиот тим кој со тоа дојде до предност од 27-25 по што гостите не искористија неколку напади и на крајот беа поразени.

Филип Кузмановски беше прв стрелец на натпреварот со девет гола, еден помалку во тимот на Охрид постигна Гоце Ојлески. Со оваа победа Пелистер се оддалечи на +5 од Вардар, а го задржа чекорот со Алкалоид од кого сега има само еден бод помалку.