Трагедија на детски фудбалски турнир во САД: Загинаа дете и маж, 11 лица се повредени (ВИДЕО)

18 октомври 2026 - 12:45

Трагичен инцидент се случи за време на детски фудбалски натпревар во американскиот град Вичита, во сојузната држава Канзас, откако комбе излетало на просторот каде што се одржувал спортскиот настан. Животот го загубиле шестгодишно момче и 35-годишен маж, додека 11 лица биле пренесени во болница со повреди.

Несреќата се случила вчера на спортскиот комплекс „Стајкер“, каде што се одржувале фудбалски натпревари за деца. Според информациите од локалната полиција, возилото завршило на тревнатата површина на комплексот, при што биле повредени повеќе присутни.

Меѓу повредените има и деца. Според првичните информации, повредите се движат од полесни до потешки, но надлежните соопштиле дека не се смета оти се опасни по живот. Дополнително, уште едно возрасно лице добило медицинска помош поради здравствен проблем кој не бил поврзан со директните последици од инцидентот. Со возилото управувала 34-годишна жена, која се наоѓа во полициски притвор и соработува со истражителите. Во комбето имало и две малолетни лица. Според полицијата, детето на возачката исто така учествувало на фудбалски натпревар во истиот спортски комплекс, но на друг терен.

Засега не е познато зошто возилото завршило на теренот, ниту дали станува збор за намерен чин. Истрагата е во тек, а полицијата работи на утврдување на сите околности.

Градоначалничката на Вичита, Лили Ву, изрази сочувство до семејствата на загинатите и поддршка за сите погодени од трагедијата. Таа истакна дека семејствата дошле на спортскиот комплекс за да ги бодрат своите деца, без да можат да претпостават дека денот ќе заврши со ваква несреќа.