Етеми со гол и асистенција го донесе Истанбул на чекор до финале за пласман во елитата (ВИДЕО)

25 мај 2022 - 19:30

Македонскиот репрезентативец Валон Етеми блесна денеска во пресрет на почетокот на подготовките за Лигата на нации, па со гол и асистенција го водеше Истанбулспор до голем триумф против Ерзурум во првиот меч од полуфиналниот бараж за пласман во турската Суперлига (4-1).

Етеми дојде до седмиот гол и деветтата асистенција во сезонава, најдобра за него во кариерата, па во Ерзурум после 16 минути му асистираше на Јазган за водство, а во 75-та даде гол за убедливи 3-0 во тој момент.

Рока во 63-та и Сарикаја во 86-та дадоа уште голови за Истанбулспор, а Тозлу погоди во 80-та и во 96-та минута колку Ерзурум да не доживее катастрофа и да остане барем со теоретски достижни два гола негатива за реваншот.

Реваншот е во недела, а во второто полуфинале играат Бандирмаспор и Ејупспор.