Нема потреба за тага: Македонија покажа дека може – Еуро 2024 и СП 2026 да ни бидат цел (ФОТОГАЛЕРИЈА)

29 март 2022 - 23:15
ФУДБАЛ

Македонија не успеа да ја извади визата за Катар, Португалија немилосрдно казни две грешки за да ни го уништи сонот, па секој пораз на секого тешко му паѓа, особено на фудбалерите, а уште повеќе кога станува(ше) збор за најважниот меч.

Но, Македонија во овој циклус покажа дека може, дека има иднина и дека допрва треба да очекуваме уште подобри резултати. После победи со Германија и европскиот првак Италија, оваа репрезентација ни донесе многу радости, ја врати вербата во македонската селекција која со години беше загубена, па било каква тага е непотребна.

Фудбалската селекција и фалангата минаа незаборавни моменти уште од Букурешт, па сѐ до Порто и позитивните вибрации треба да останат, зашто оваа генерација не го кажала последниот збор, а најголем дел од неа допрва ќе влезат во најзрелите фудбалски години.

Овој циклус заврши, започнат со пласманот на Еуро 2020, а од утре почнува нов. И целите треба да ни бидат највисоки. Пласман на Еуро 2024 и на Мундијалот во 2026.