Вардар го набрка без причина, а сега е избран за фудбалер на годината! (ФОТО)

24 декември 2019 - 15:33

Поранешниот напаѓач на најтрофејниот македонски клуб Вардар, Драган Ќеран ги собра сите најпрестижни награди во Узбекистан откако денеска беше избран за најдобар фудбалер на оваа земја, а покрај оваа награда ја доби и „златната копачка“ за најдобар стрелец, а со тоа се најде и во тимот на сезоната.

Ќеран дојде во Вардар пред три години како засилување за нападот, но не доби преголема шанса во дресот на црвено-црните, одигра само 12 меча во кои постигна пет гола и потоа Србинот беше практично набркан без причина како непотребен за тимот. Откако си замина од Скопје, Ќеран најде ангажман во Узбекистан во таборот на Насаф Карши, а од лани е дел од еден од најпопуларните клубови Пахатор од Ташкент за кој сезонава на 22 меча даде 23 гола (просек над еден гол по меч), а со својот клуб ја освои двојната круна, откако убедливо стана шампион, а потоа го освои и Купот на Узбекистан.

Србинот си замина од Вардар поради недоразбирања со тогашниот кормилар Гоце Седлоски, кој од летоска повторно е дел од црвено-црните како спортски директор на клубот. Ќеран се најавува дека ќе заигра за узбекистанската репрезентација, а инаку во кариерата има играно за Смедерево, Млади Радник, Вестерло, Хапоел Хаифа, Макаби Нетанја, Симурк и Хајер.