„Новата Маракана“ од 200 милиони евра ќе личи на вселенски брод (ФОТО)

17 декември 2019 - 07:30

Белградска Црвена Звезда, поранешниот европски шампион од 1991 година за три сезони во кои се врати на европската сцена успеа да заработи 100 милиони евра (вклучувајќи и трансфери на дел од своите играчи во овој период), па завчера директорот на клубот Звездан Терзиќ најави дека за две години ќе почне реновирање на „Маракана“ со 200 милиони евра.

И после најавата за модернизација на домот на белградските црвено-бели, српскиот таблоид „Курир“ синоќа објави фотографии од евентуалниот изглед на стадионот, кој за разлика од досегашниот капацитет од преку 55 илјади столчиња ќе биде намален на 42.000.

Ултрамодерниот стадион кој е во план да се изгради, а повеќе од извесно е дека во проектот ќе учествува и државата, веќе доби прекар „Вселенска Маракана“ поради изгледот на „вселенски брод“. Србите веќе го најавија стадионот како најубав и најмодерен на Балканот.

Според најавите две до три години ќе трае изградбата на „новата Маракана“, а стартот на проектот би требало да почне за две години. Веќе има пет планови од кои треба да се избере една, а најважниот дел е дали ќе се тргне атлетската патека или не. Според планот прво ќе се гради источната трибина, потоа страничните „навивачки“ север и југ, додека западната ќе остане иста, со тоа што евентуално би се продолжила кон теренот, ако се тргне атлетската патека.