Вардар избега од "Филип Втори" - ќе игра во Маџари до крај на есенскиот дел

Вардар веќе извесно е дека бега од Арената, зошто ова е втор домашен меч на кој без прична ќе игра на алтернативен стадион, кој ако ништо друго е очаен поради тоа што е – нерамен. Следните два натпревари во првеството и Купот, односно против Шкупи и Македонија Ѓорче Петров, нашиот најтрофеен тим дефинитивно ќе ги игра на стадионот „Борис Трајковски“ во Скопје.

Според некои информации, Вардар воопшто и не побарал да игра на „Филип Втори“, ниту да се договорил за користење на стадионот, што го отвара прашањето зошто црвено-црните бегаат од својот дом и дали сето тоа е поврзано со долгот и блокадата кој акционерското друштво. Нејасно е и зошто од Вардар не се обидуваат да го решат проблемот, кој постои од поодамна, посебно во период кога е најавено дека клубот ќе се врати на градот Скопје до крајот на годинава и сето тоа со подмирени и чисти сметки.

Неофицијално, Вардар до крајот на есенскиот дел од сезоната своите натпревари како домаќин ќе ги игра на стадионот „Борис Трајковски“ во Маџари.

Од друга страна нејасен е и фактот зошто ФФМ пак закажа меч на Вардар на нашиот најголем стадион, ако црвено-црните очигледно немаат намера да играат таму. Ист случај беше со пресметката со Македонија ЃП пред три недели (1-0), кога ФФМ го закажа дуелот за „Филип Втори“, а ден подоцна Вардар објави дека ќе игра во Маџари.

Црвено-црните од поодамна имаат блокирана сметка за долгови за користење на стадионот од Акдионерското друштво за стопанисување со станбен и деловен простор (АДССДП), а од претходно имаа и спор околу цените за користењето. Но, фактот дека Вардар заглави во финансиски проблеми летово, а фудбалерите сè уште чекаат да ги добијат своите плати, го отвараат тој сомнеж веројатно дека поради беспарицата црвено-црните или не можат или не сакаат да се вратат на Арената.