Вембањама ѝ пркосеше на физиката – шутираше од висина од која другите едвај забиваат (ВИДЕО)
Екипата на Сан Антонио Спарс славеше во дуелот против ЛА Клиперс (124-112), предводени од извонредниот Виктор Вембањама, кој мечот го заврши со 32 поени и 11 скока. Францускиот центар во финишот изведе потег што веднаш стана вирален на социјалните мрежи, откако наместо да забие, упати прецизен шут со рацете поставени буквално над нивото на обрачот. Голема поддршка доби од Стефон Касл (21 поен, 12 асистенции) и Џулијан Шампани (20 поени). Со овој триумф и учинок од 13 победи и три порази, Спарс го делат првото место во Западната конференција со ЛА Лејкерс. Кај Клиперс најефикасни беа Дариус Гарланд и Брук Лопез со по 23 поени.
Портланд Трејл Блејзерс му го нанесоа 12-тиот последователен пораз на Милвоки Бакс (124-114) и тоа на гостински терен. Во својот прв натпревар против поранешниот клуб откако ја скина Ахиловата тетива во април 2025 година, Демијан Лилард блесна со сезонски рекорд од 33 поени, додека Скут Хендерсон додаде 27 поени. Двајцата кошаркари погодија по пет тројки.
Мемфис Гризлис ја продолжија одличната форма и дојдоа до петтата победа во низа, декласирајќи го Голден Стејт вориорс (126-98). Џејлен Велс беше најдобар стрелец со 22 поени и седум скока, Седрик Кауард постигна 19, а дебитантот Камерон Бузер додаде 16 поени без промашување од игра. Вориорс, кои настапија без повредените Стефен Кари и Дрејмонд Грин, имаа очаен шут за три поени (5/29) и го запишаа петтиот пораз на исто толку гостувања, а единствена светла точка кај нив беше Чарлс Беси со 16 поени и 13 скока.
Актуелниот НБА-првак Њујорк Никс стигна до третата победа по ред, откако во крајно неизвесна завршница ја совлада Минесота Тимбервулвс (102-99). Иако имаа предност од 19 поени во третата четвртина, гостите не постигнаа ниту еден поен во последните три минути и 26 секунди, но победата беше сочувана откако Ламело Бол промаши шут за три поени за израмнување на 9,9 секунди до крајот. Карл-Ентони Таунс запиша 22 поени и 12 скока против својот поранешен тим, а Џејлен Брансон додаде 21 поен и седум асистенции. Во редовите на Минесота, Џонатан Куминга постигна 23 поени, додека Бол заврши со 15 поени, осум скока и осум асистенции.