Македонија гостува во Глазгов со желба за прв(и) гол(ови) и бод(ови) во Лигата на нации!

За македонскиот национален тим ова гостување претставува нова шанса за прекинување на катастрофалната серија во актуелното издание на натпреварувањето, во кое по четири одиграни кола екипата сè уште нема освоено ниту еден бод, забележувајќи четири порази со поразителна гол-разлика од 0-10. Дополнителен проблем за стручниот штаб пред овој дуел ќе биде отсуството на Бојан Миовски, откако напаѓачот на Глазгов Ренџерс не доби повик за овој репрезентативен прозорец поради малата минутажа во својот клуб.

Спроти македонскиот состав ќе застане репрезентација која на претходниот меѓусебен дуел одигран во Скопје славеше со погодоците на Керон Боуи и Џон Мекгин. Тој триумф воедно беше и прва победа за новиот шкотски селектор Себастијан Покоњоли. Домаќините влегуваат во овој натпревар од третата позиција во групата со четири освоени бода, со јасна амбиција преку нова победа над Македонија да направат клучен чекор кон обезбедување опстанок во Б-сегментот, задржувајќи ги шансите и за евентуален пласман во баражот за елитната Лига А.

За остварување на оваа цел, Покоњоли ги повика своите најважни адути, враќајќи го во тимот Скот Мектоминеј кој го пропушти претходниот собир, како и Че Адамс во нападот. Во составот е и капитенот Енди Робертсон, кој по неодамнешниот јубилеј од 100 репрезентативни настапи, сега има можност дополнително да му се приближи на апсолутниот рекорд на легендарниот Кени Далглиш од 102 одиграни натпревари за државниот тим.

Историјата на меѓусебните пресметки апсолутно е на страната на островската селекција. Во досегашните пет одиграни натпревари, Шкотска има забележано три победи, еден дуел завршил без победник, додека Македонија има само еден триумф. Единствената победа на македонската репрезентација датира од 2008 година, кога националниот тим славеше со минимални 1-0 благодарение на погодокот на Илчо Наумоски, додека последното гостување во Глазгов одиграно во 2012 година заврши со нерешен резултат од 1-1.