Ѓоковиќ го очекува пекол во Париз, а од тоа му зависи пласманот во Торино

Српскиот тенисер, кој е поставен за десетти носител, во првото коло ќе игра против Валентен Вашеро од Монако. Доколку ја мине почетната пречка, во втората рунда може да се сретне со Италијанецот Лучијано Дардери или со тенисер од квалификациите.

Меѓутоа, вистинските предизвици доаѓаат потоа. Во третото коло можни противници му се Андреј Рубљов, Томас Ечевери или осмиот носител Алекс де Минор. Ако стигне до четвртфиналето, таму најверојатно би го чекал првиот носител Александар Зверев.

Ниту евентуалното четвртфинале не би било крај на маките за Ѓоковиќ. Во неговиот дел од ждрепката се наоѓаат и Бен Шелтон, Франсес Тијафо и Томи Пол, кои би можеле да му бидат ривали во полуфиналето.

За 39-годишниот Ѓоковиќ овој турнир има огромно значење и поради трката за пласман на завршниот Мастерс во Торино. По поразот од Јан-Ленард Штруф во Базел, Србинот падна на 11. место во трката со 2.890 поени. За да остане во игра за едно од преостанатите места, најмалку ќе му биде потребен пласман во полуфиналето, додека финалето речиси сигурно би му донело билет за Торино.

Ѓоковиќ е рекордер со седум титули на Мастерсот во Париз, но годинава го очекува дополнителен предизвик. Турнирот ќе се игра од 2 до 8 ноември, а Србинот ќе се обиде да ја продолжи борбата за уште еден голем трофеј и место меѓу најдобрите осум на крајот од сезоната.