Американците во шок: Антиќ го понижуваше Леброн во интервју (ВИДЕО)

21 октомври 2026 - 08:43

Поранешниот македонски кошаркар Перо Антиќ упати остри критики кон Леброн Џејмс доведувајќи го во прашање неговото место меѓу најголемите кошаркари во историјата. Неговите коментари, изнесени во подкастот „Јао Миле“, предизвикаа нова дебата за наследството на суперѕвездата на НБА-лигата, но и предизвикаа бура во американските медиуми кои ги цитираа коментарите на поранешниот кошаркар на Атланта Хоукс.

Антиќ не штедеше зборови зборувајќи за Леброн, кого често го споредуваат со Мајкл Џордан и Коби Брајант. Според поранешниот македонски репрезентативец, начинот на кој Џејмс ја игра кошарката и неговото однесување на теренот се причина поради која сè потешко му е да ужива во натпреварите од најсилната кошаркарска лига во светот.

„Не можам веќе да ја гледам НБА лигата. Го споредуваат со Џордан и Коби. Што? Тој е како мало девојче, постојано бара нешто, па симулира прекршоци и приговара“, изјави Антиќ во подкастот „Јао Миле“.

Тој се осврна и на начинот на кој Леброн ги гради своите индивидуални достигнувања, особено во однос на вечната листа на најдобри стрелци во НБА лигата и желбата да настапува заедно со својот син Брони Џејмс.

„Ќе го бркам рекордот по бројот на поени намерно, за никој никогаш да не може да ме стигне. Сакам и син ми да игра со мене. Не треба така да функционираат работите“, порача Антиќ, критикувајќи го пристапот на Леброн кон личните рекорди и семејната приказна во НБА.

Коментарите на македонскиот кошаркар повторно ја отворија една од најголемите дебати во современата кошарка – дали Леброн Џејмс заслужува да биде рамо до рамо со Џордан и Коби во дискусиите за најголемиот кошаркар на сите времиња. Додека неговите поддржувачи ги истакнуваат долговечноста, индивидуалните рекорди и шампионските титули, критичарите често му забележуваат за однесувањето на теренот и за начинот на кој ја гради својата кариера.