Кулушевски откако заигра по 526 дена: Беше убаво и тешко, сега сум друг човек

Шведскиот репрезентативец вчера ги одигра првите минути по 526 дена отсуство, во победата против Ковентри.

Крилниот напаѓач, кој за себе вели дека станал попаметен и поинаков човек, влезе во игра во 86. минута. Тоа беше негов прв настап од 11 мај 2025 година, кога заработи тешка повреда на коленото. Неговото враќање дојде во натпревар на кој Тотнем ја оствари првата победа во новата сезона од Премиер лигата, совладувајќи го Ковентри Сити со 3-1.

„Многу сум благодарен што морав да поминам низ ова. Сега сум подготвен за фудбал. Се гледам себеси поинаку. Мислам дека сум друг човек. Сè уште сум истото момче кое сака да игра фудбал, но сега сум малку попаметен, па затоа сум среќен“, изјави Кулушевски за „Скај Спортс“.

Поранешниот играч на Јувентус се осврна и на психичкиот и физичкиот напор за време на рехабилитацијата, нагласувајќи го личниот раст што го доживеал во тој период. Тој истакна дека е горд на истрајноста што ја покажал за време на долгото отсуство од терените.

Неговото враќање претставува големо засилување за клубот од северен Лондон, на кој му недостигале неговата продорност и креативност на крилните позиции.

„На сите ќе им раскажувам за ова патување. Тоа беше неверојатно искуство, иако понекогаш беше тешко. Всушност, тешкотиите се нешто убаво“, изјави Кулушевски.