Буфон не штедеше пофалби за Гатузо - го спореди со големиот Марчело Липи!

Буфон во разговор за „Газета дело Спорт“ се присети дека за време на својот мандат на позицијата шеф на делегацијата на италијанската репрезентација токму тој го предложил Гатузо за селектор.

„Јас го предложив, не го избрав. Не бев претседател, а не верувам ни дека некогаш ќе бидам. Го предложив со големо убедување бидејќи знаев дека, и покрај многу краткото време што го имаше на располагање, ќе успее да воспостави однос со тимот, да внесе емпатија и чувство на припадност. И дека, и покрај сите предрасуди и етикети со кои отсекогаш се соочува, ќе биде стручен селектор“, изјави Буфон, а потоа додаде:

„Веќе дванаесет години работеше како тренер, имаше различни искуства, а пред сè поседуваше харизма која беше совршена за репрезентацијата да излезе од кризата на идентитетот“.

Поранешниот голман на Јувентус го спореди својот пријател со легендарниот Марчело Липи.

„Кај Рино го препознавам начинот на кој Липи управуваше со групата, како и способноста од секој играч да ја извлече енергијата и борбеноста. Сите знаете дека играчите би скокнале во оган за него, исто како што би го направиле тоа и за Марчело Липи. Се надевам дека сега нема да тврдиме дека тренерите во Серија А не се добри или дека не ја познаваат тактиката. Сите тие се стручни и компетентни. Разликата е во односот што го воспоставуваат со тимот и во начинот на кој им го пренесуваат своето знаење на играчите“, истакна Буфон.

Лацио предводен од Гатузо сезонава има одличен почеток и во овој момент по седум кола римјаните се изедначени на врвот со Интер со по 19 бода.