Двајт Хауард по два натпревари во Грузија ја заврши кариерата

Последниот натпревар го одигра во саботата во дресот на грузискиот Блек Форест од Тбилиси, по што клубот потврди дека легендарниот Американец се повлекува од кошарката. Така, по 18 сезони во НБА-лигата и неколку години поминати во азиската кошарка, стави крај на кариерата долга повеќе од две децении.

Престојот на Хауард во Грузија траеше само два натпревари, а неговиот тим во двата наврати претрпе пораз. На дебито против Ивериони од Гори забележа 12 поени, седум скока и три блокади за само 17 минути, но Блек Форест загуби со 75:70. На својот последен професионален настап, против Универзитетот од Тбилиси, помина 19 минути на паркетот и запиша десет поени, четири скока и две блокади. Неговиот тим беше поразен со 89:82 и остана без победа по три кола во грузиското првенство.

Американскиот центар беше избран како прв пик на НБА-драфтот во 2004 година, кога го ангажираше Орландо Меџик. Токму на Флорида ги помина најдобрите години од кариерата, а во 2009 година го предводеше тимот до големото финале во НБА-лигата, во кое Орландо загуби од Лос Анџелес Лејкерс. Во тој период Хауард беше еден од најдоминантните играчи под кошевите, особено благодарение на своите скокачки и дефанзивни способности.

Врвот на индивидуалната кариера го достигна меѓу 2009 и 2011 година, кога трипати по ред беше прогласен за најдобар дефанзивец во НБА-лигата. Сепак, на шампионскиот прстен мораше да чека до 2020 година, кога како член на Лос Анџелес Лејкерс ја освои единствената НБА-титула во кариерата.