Продолжуваат проблемите за Карик: Јунајтед некомплетен на гости кај Атлетико

12 октомври 2026 - 14:11

Мајкл Карик се соочува со дополнителни проблеми пред гостувањето на Манчестер јунајтед кај Атлетико Мадрид во Лигата на шампионите. Двајца важни фудбалери, Лук Шо и Коби Мејно, не тренирале со тимот, па нивниот настап на претстојниот натпревар е неизвесен.

Според информациите што ги пренесуваат англиските медиуми, во текот на денот треба да биде донесена одлука дали двајцата ќе патуваат со екипата во Мадрид. Засега не е познато дали станува збор за замор или за посериозни физички проблеми.

Особено загрижува ситуацијата со Шо, кој со години има проблеми со повредите. Манчестер јунајтед во летниот преоден рок не ангажираше директна замена за него, па евентуалното отсуство на англискиот репрезентативец би можело дополнително да го отежне изборот на Карик. Проблемите со играчкиот кадар доаѓаат во период кога Манчестер јунајтед се соочува и со резултатска криза. Тимот не успеа да го победи Тотенхем на домашен терен, откако прими гол во судиското продолжение, иако противникот играше со фудбалер помалку.

„Црвените ѓаволи“ имаат само една победа на првите шест натпревари во Премиер-лигата, поради што критиките кон Карик стануваат сè погласни. Ситуацијата во Лигата на шампионите засега е нешто подобра. Манчестер јунајтед ја започна европската кампања со убедлива победа од 4-0 против Сабах, но гостувањето во Мадрид ќе претставува значително посериозен тест.