Сензација во Шангај: Алкараз елиминиран уште во третото коло!

12 октомври 2026 - 14:50

Карлос Алкараз доживеа непријатно изненадување на Мастерсот во Шангај, откако загуби од Белгиецот Зизу Бергс со 0-2 во сетови, 5-7, 6-7 и го заврши настапот многу порано од очекуваното.

Бергс одигра одличен натпревар и ја искористи својата шанса против еден од најдобрите тенисери во светот. Белгиецот покажа голема сигурност во клучните моменти и по два часа и три минути игра стигна до една од најголемите победи во својата кариера.

Алкараз, кој во Шангај пристигна по освојувањето на титулата во Токио, се надеваше на продолжување на победничката серија, но не успеа да го пронајде вистинскиот ритам против мотивираниот противник. Шпанецот имаше сериозни проблеми да се приспособи на условите за игра и на високиот отскок на топката. Во завршницата од првиот сет, при резултат 5-6, беше видно фрустриран и му се пожали на својот тренер дека не може да игра на таков начин.

Неговата игра беше далеку од посакуваното ниво. Во првиот сет направи дури 15 неизнудени грешки, а Бергс го искористи тоа за да поведе со 7-5. Во вториот сет двајцата тенисери беа многу посигурни на свој сервис. Алкараз успеа да се врати во игра кога Бергс сервираше за победа, но во тај-брејкот Белгиецот повторно беше посмирен и го комплетираше големото изненадување.

За Бергс ова е огромен успех и потврда дека може да се надигрува со најдобрите тенисери на светот. Алкараз, пак, ќе мора брзо да го заборави разочарувањето и да се насочи кон следните предизвици во завршницата од сезоната.