„Лансирањето на Гаштаров е најдобриот потег на Риера во Звезда“

Гаштаров не беше воопшто во плановите на неговиот претходник Дејан Станковиќ, а исто така тој немаше доверба ниту во Стефан Гудељ кој сега во тандем со нашиот репрезентативец функционира одлично.

„Стефан Гудељ и Матеј Гаштаров се најсветлите точки на Црвена звезда во периодот од доаѓањето на Алберт Риера на тренерската позиција, а лансирањето на дваесетгодишниците е најдобриот потег на Шпанецот откако е на „Маракана““, пишува „Спорт клуб.

Во продолжение од текстот се најавува и европско деби на Македонецот против Лугано на гостувањето од Конференциската лига.

„Европско деби му се насмевнува и на Гаштаров, момчето кое ги освои симпатиите на навивачите на Црвена звезда. Тој почна да упатува сè подобри топки со кои ги пробива одбраните на противниците, а кога ќе добие уште поголема самодоверба и дрскост, сè ќе биде уште подобро. Токму Риера зборуваше дека интензивно работи на тоа Македонецот да ја надмине својата срамежливост и да изгради карактер што ќе му помогне во кариерата“, се додава во текстот.

Гаштаров ќе потсетиме беше и една од ретките светли точки во нашата репрезентација во четирите порази во новото издание од Лигата на Нации.