Историски дуел на двете Шкендии, Вардар по победа во Автокоманда

Шкендија Арачиново од 13 часот на Чаир ќе ја пречека Шкендија од Тетово во дуел што ќе биде прва меѓусебна пресметка на овие два тима во прволигашката конкуренција. Домаќините ќе имаат можност на свој терен да се соочат со еден од најквалитетните тимови во македонскиот фудбал, во натпревар кој привлекува внимание и поради имињата на двата клуба. Двете екипи имаат три пресметки досега, последната од мај годинава, но сите се во рамките на Купот на Македонија.

Тетовци во Скопје пристигнуваат како лидери на табелата со 19 бода од осум натпревари, додека Шкендија Арачиново е на петтото место со 13 бода. Разликата е шест бода, но домашниот тим сигурно ќе се обиде да ја искористи предноста на својот терен и да приреди изненадување против фаворизираниот противник. Од друга страна, Шкендија од Тетово ќе атакува на нови три бода со кои би го зачувала врвот на табелата.

Од 15 часот, Вардар ќе гостува кај Скопје во Автокоманда во натпревар во кој целта на „црвено-црните“ е освојување на трите бода. Вардар моментално има 14 бода и се наоѓа на третата позиција, па победата би му овозможила да остане во чекор со водечките екипи.

Скопје, пак, е последнопласиран со само три бода и сè уште ја чека првата победа во првенството. Домаќините ќе се обидат да ја искористат секоја можност за позитивен резултат и да го прекинат лошиот почеток на сезоната.