И мадридските медиуми удрија по Винисиус: Очигледно, Бразилецот не ги знае правилата!

11 октомври 2026 - 09:55

Винисиус Жуниор повторно е во центарот на фудбалската полемика, но овојпат критиките не се однесуваат само на неговото однесување на теренот, туку и на познавањето на фудбалските правила. Шпанска „Марка“ го анализираше спорниот момент на натпреварот против Виљареал, посочувајќи што предвидува правилникот во вакви ситуации.

Контроверзниот момент се случи во второто полувреме, кога Винисиус ја затресе мрежата на противникот, но погодокот беше поништен по интервенцијата на ВАР. Снимките покажаа дека Бразилецот го повлекол за коса противничкиот фудбалер Нејтан Салиба, по што судијата му покажа директен црвен картон.

Според правилата на фудбалската игра, повлекувањето на противникот за коса може да се третира како насилно однесување и да биде санкционирано со директен црвен картон. За ваквата одлука не е неопходно да има сериозна повреда или особено силен контакт – важни се природата на постапката и нејзиниот карактер. Токму затоа спорниот потег на Винисиус претставува сериозен проблем за Бразилецот. Додека тој можеби сметал дека станува збор за незначителен контакт во дуелот, правилникот предвидува строга санкција за вакво однесување.

Дополнителен проблем може да биде и неговата реакција по исклучувањето. Протестите кон судијата и однесувањето по покажувањето на црвениот картон можат да бидат земени предвид при дисциплинската постапка, зависно од содржината на судискиот извештај.

Винисиус по натпреварот им се извини на соиграчите и навивачите, но подоцна повторно предизвика реакции со објава на социјалните мрежи, во која потсети на ситуации за кои смета дека бил неправедно санкциониран.