Жезус попушта - сака средба со Роналдо за смирување на тензијата

Според информациите на „А Бола“, зад кулисите веќе е направен значаен чекор кон организирање на состанок. Португалската фудбалска федерација се обидува да посредува меѓу двете страни и да создаде услови за директен разговор.

Жезус, кој се најде во центарот на случувањата откако Роналдо остана на клупата против Данска, сега покажал подготвеност за дијалог. Сепак, конечната одлука останува кај самиот Роналдо, од кого федерацијата сè уште очекува одговор. Португалските челници, според истиот извор, не сакаат актуелната ситуација да заврши со ненадеен прекин на долгогодишната репрезентативна кариера на Роналдо. Затоа се разгледува можноста средбата да биде одржана на неутрална локација, со цел разговорите да се одвиваат без дополнителен притисок.

Ситуацијата веќе предизвика големо внимание во јавноста. Во Лисабон се појавија транспаренти во поддршка на Роналдо, додека репрезентативците беа пречекани во Порто во атмосфера исполнета со голем интерес и медиумско внимание. Роналдо во моментов е во Мадрид и не се огласува јавно по заминувањето од репрезентативниот камп во Копенхаген. Португалија, пак, се подготвува за следниот натпревар во Лигата на нациите против Норвешка, што дополнително ја зголемува важноста на обидот за смирување на ситуацијата.

Засега нема потврда дали Роналдо ќе ја прифати иницијативата за средба. Токму неговиот одговор се очекува да биде следниот клучен чекор во обидот за надминување на кризата.