Падна првата тренерска жртва во Серија А

Иако Гросо успеа да забележи победа во Купот на Италија, резултатите во Серија А беа далеку под очекувањата. Фиорентина загуби од Рома, Фрозиноне и Торино, а по трите натпревари се најде на дното на табелата со гол-разлика 1-9.

Таквиот старт го натера раководството на клубот да реагира веднаш, а изборот за наследник изненадувачки падна на добро познато име. Станува збор за Паоло Ваноли, тренерот кој ја водеше Фиорентина во завршницата од минатата сезона. Ваноли пристигна во Фиренца откако Стефано Пиоли доби отказ и успеа да ја стабилизира екипата и да ја спаси од испаѓање во Серија Б. Сепак, по завршувањето на сезоната двете страни се разделија, а на негово место беше ангажиран Гросо.

Само три месеци подоцна, ситуацијата би можела целосно да се сврти. Ваноли сега е на чекор од сензационално враќање во клубот, а според информациите од Италија, преостанува да се договорат последните детали околу неговиот ангажман. Интересно е што во претходните денови како еден од кандидатите за клупата на Фиорентина се споменуваше и Тијаго Мота. Сепак, раководството експресно се определило за човекот кој добро ја познава екипата и ситуацијата во клубот.

Ваноли при неговиот прв престој во Фиренца најави дека сака да изгради „голема Фиорентина“. Сега ќе добие нова можност да го продолжи тој проект, но под многу поголем притисок и со задача веднаш да ја прекине кризата.