Вардар немоќен и со фудбалер повеќе, Тиквеш со херојска игра освои бод!

Домаќините први постигнаа гол на натпреварот, кога Фал успеа во 21. минута да ја затресе мрежата на Диковски за водство од 1-0, но само неколку минути подоцна почнаа проблемите за Тиквеш.

Лавал со лакт го удри Најдовски, по што се активира и ВАР-технологијата, а на крајот судијата му покажа директен црвен картон.

Вардар тргна по израмнување откако кавадарчани останаа со играч помалку, а потоа Азер Омерагиќ успеа да погоди за гостите и да израмни на 1-1.

Тиквеш во вториот дел беше одличен во одбраната, додека Вардар се мачеше да го пробие „бункерот“ на кавадарчани, кои ја чекаа својата шанса на контра-напади.

Вардар не се закани посериозно кон голот на Тиквеш, додека домашниот тим имаше неколку опасни шанси од контра-напади, а најблиску до втор гол беше во 56. минута кога погодија пречка.

По пет одиграни кола во првата лига, Тиквеш е на третата позиција со осум бодови, додека Вардар е на делба на четвртата позиција со седум поени.