„Ова ми беше најтешко лето – не можев да гледам како Шпанија го освојува пехарот!“

Младиот играч за врска не успеа навреме да закрепне и да се избори за место во составот на селекторот Луис де ла Фуенте, за разлика од Ламин Јамал и Нико Вилијамс, кои и покрај здравствените проблеми отпатуваа на Мундијалот. Во интервју за „Каталуња Радио“, Лопез призна дека пропуштањето на најголемиот фудбалски настан било најтешкиот момент во неговата кариера.

„Ова беше најтешкото лето во мојот живот, без никакво сомнение. Сè одеше совршено, се чувствував во најдобрата форма во кариерата, а потоа дојде повредата. На почетокот не можев ниту да ги гледам натпреварите на Шпанија. Ми беше премногу тешко, затоа што сакав да бидам таму и да играм“, изјави фудбалерот на Барселона.

И покрај личното разочарување, Лопез призна дека со голема радост го прославил успехот на својата репрезентација.

„Освојувањето на трофејот многу ми значеше. Среќен сум за мојата земја, за сите соиграчи, а особено за момците од Барселона. Научив многу од ова искуство, иако беше огромен удар за мене“, додаде шпанскиот репрезентативец.

Фермин сега е целосно фокусиран на враќањето во натпреварувачки ритам и верува дека најдоброто допрва доаѓа.

„Мојата цел е да се вратам уште посилен и помотивиран. Верувам дека повторно ќе бидам на највисоко ниво. Минатата сезона покажав што можам да му понудам на тимот, а сега сакам само да продолжам да напредувам“, порача Лопез.

Фермин Лопез е производ на младинската школа на Барселона, а од 2023 година е член на првиот тим. За шпанската репрезентација досега има седум настапи, а по закрепнувањето од повредата ќе се обиде повторно да се избори за место меѓу најдобрите во националниот тим.